安達魯西亞‧西班牙南部 ~ 飲飲食食

2008年8月23日下午4:44公開累積瀏覽 689 1

嚟到西班牙南部，除了明媚的風光 ，不得不提她們的美食!!! 莎倫和大口的二人女子為食團，尋尋覓覓繼續在西班牙南部尋找好味的 ................

 

原先在格拉那達 Granada，我們一心只看古蹟，以為只有個 Alhambra Palace 阿爾汗布拉宮，而 d 旅遊書又冇特別介紹有d mud 嘢食店，點知，咁樣反而帶來驚喜 ! 莎倫行了大半天，加上晏晝只係食咗d乾糧，好肚餓呀! 莎倫和大口係 Plaza Nueva 往 Albaicin 阿爾拜辛區的路上搵吓有咩食，因為沿路都有不少餐廳，我們 "共吓共吓"，首先望吓有冇英文 menu，再睇吓d價錢我地可唔可以接受，d餐廳通常都張貼個 menu 出嚟，慢慢睇啱先.........大口話想搵間有番茄涷湯飲嘅，就係一間名為 Rabo de Nube 有晒我地的要求，我地係睇見佢有個二人海鮮set，又有番茄湯，所以決定幫襯!

 

 

餐廳分室內和室外，洋人梗係喜歡室外喇! 我們就入裡面食，餐廳有d家庭 feel，並不豪華。

 

前菜有幾條沙甸魚同橄欖，賣相麻麻地，但係好食架，實而不華囉! 然後，番茄涷湯出場；講起番茄涷湯，莎倫原先想像唔到原來係咁好味嘅，仲有d抗拒添，始終係中國人口胃，點樣d湯會係涷架，湯應該要熱騰騰至得架，涷冰冰點會好味呢? 飲完會唔會肚仔痛架?! 嘩! 唔試就走寶喇! 其實番茄涷湯係安達魯西亞夏天時的餸菜，由於天口熱，所以個湯就涷冰冰降吓溫囉!

 

這就是二人海鮮餐，好大碟，有魷魚、魚扒、沙甸魚、青口、蝦同埋蜆，非常鮮甜，d材料好新鮮，好好味，我們食得好飽足呢! 間餐廳其貌不揚，但卻吃到好嘢，好滿足! 哩餐合共 38.5 Euro!
去到塞維爾 Sevilla，早已知她的 Tapas Bar (Tapas 是西班牙小食的意思) 好出色，但莎倫同大口毫無 idea 邊間好邊間出名。而醫肚最實際 ，邊得閒考究間餐廳出唔出名，我們由格拉那達嚟到塞維爾，到settled 好晒，已是下午2點幾時間，莎倫真係勁肚餓，由酒店行往大教堂旅遊區方向，在阿卡乍堡公園前的街口，有幾間餐廳，大口都好明白莎倫好肚餓，停低咗研究吓門口個 menu，然後有位好靚嘅侍應姐姐走過來，大口問靚姐姐有冇英文餐牌，靚姐姐除咗樣子甜美，氣質非凡之外，仲好親切添 ! 梗有英文menu喇，靚姐姐d服務態度咁好，我地就係哩間食喇! 靚姐姐d英文好好，好好聽....原來佢唔係西班牙人，而係英國人，唔怪得知喇! 除咗西班牙文，佢仲識法文添，我們閒聊咗一陣，有時，這就是自由行的好處，可以跟不同國家的人傾吓計，交流吓，認識吓人地嘅風土民情。

 

這間餐廳非常好，d嘢食size可以選擇的，有正常餐的 size, 也有 Tapas size，除咗個沙拉是正餐 size，其餘我們都揀 Tapas size，貪其細細碟，order多幾碟，可以食多d唔同款式麻 ..............莎倫好想講，到哩一刻，仍然好懷念這裡的美食，沙拉d菜同蝦都好新鮮，芝士好香，一"pat" 嗰碟請不要小看它，係豬嘅面珠肉，d肉質香軟極好食，仲有薯仔香腸，牛扒同埋西班牙煎蛋餅，全部都好香口好好味道架 !

 

 

 

我們又飲 Sangria 喇! 好飲又抵過飲可樂。莎倫和大口哩次學d西洋人咁坐露天茶座，都幾舒服寫意，好悠閒，爽呀! 此餐多謝盛惠 28 Euro!

 

係塞維爾的第二日，由於時間好充裕，中午不用吃乾糧，我們就入咗間 Tapas bar 食 lunch.................

 

hmmmmm.............眼見切火腿的那位哥哥態度好 ok，但，另一位 served 我地嘅姐姐就好唔掂喇，莎倫同大口再次遇到黑面神 ...........唉! 不過算啦! d嘢食唔係太貴，味道都 ok ，仲 ordered 咗兩柸 Rosado 玫瑰紅酒，總共都係 11.70 Euro，算了吧! 後來莎倫番看旅遊書，先知原來這間 Cinco Jotas 是深受塞維爾人喜愛的餐館........莎倫同大口就 拎晒頭!

 

是日晚上，我地決定吃好一點，因為係最後一晚係塞維爾，第二朝一早要飛去巴塞隆納 Bacalona 喇! 莎倫同大口仍然念念不忘靚姐姐嗰間餐廳的美食，所以我地決定再幫襯.......................真係冇令我地失望呀!!! 莎倫要比5粒星佢地 ，無論服務態度同d食物質素都是一流架! 好好好! 莎倫好開心呀，終於一嘗到 Jerez 雪莉酒，在出發嚟西班牙之前已決定嚟到要試要試........Jerez 雪莉酒盛產於西班牙南部，莎倫跟侍應哥哥說想試 Jerez 雪莉酒，佢話有呀......at small glass! Small glass， OK，相信係酒精濃度較高，所以 small glass per order。嘩嘩! d酒充滿果香，好甜，濃郁的酒香，在口腔的餘韻久久不散 ，大口就覺略甜，佢話哩d酒，飲醉咗都唔知咩事 ，哈哈 好同意!

 

哩碟係番茄多士配 Jamon 西班牙風乾火腿，原來兩者係可以咁埉，番茄多士清爽而火腿的味濃，加埋一起係等如好吃囉! 另外，再ordered 咗個沙拉，d菜仍然係好新鮮，加埋面頭d脆卜卜好香口，不會因為係沙拉就太清淡，而黑色的是墨魚，同一碟嘢食，口感竟然可以咁豐富，好吃! 仲有煎鴨胸同阿根廷牛扒，我地揀咗 Tapas size， "小吃多滋味"麻 !

 

 

 

 最後靚姐姐再出現，介紹我地吃這個甜品，好香好香呀! 雖然，好味道，但，莎倫已好飽，只吃了一口，唔該晒大口吃晒成件! 今晚吃咗 37 Euro !

~待續 ~ 下一篇已是此旅程最後一站巴塞隆納喇! 好唔捨得!

• Granada,
• Sevilla,
• 塞維爾,
• 旅遊,
• 格拉那達,
• 歐、美、澳